Le li ont pa dit
Ulysse Dubois
(1925-...) [Lezay]
[grafanjhe d'Écrivajhes, Ed. Geste paysanne, 1985]
...
O vat pa core si fort çhète pore Léa Poulioute :
A peut pu se rabalé, a sort casiment pu,
Y at lontenp qu'al at pa été jhusqu'a la route.
Ce que l'on fèt de l'atre couté, lè, al o-z-at pa vu...
A s'ocupe bè in petit : a dégousse lés mojhètes,
A pare deus ou troas trouflles san groullé de son fotell,
A pllaye touts lés mouche-na, a petogne leus chossètes.
Dame, su petit qu'on la choque, a s'en prind a sés ells.
*
Alore le li ont pa dit.
Alore le li ont pa dit
Que la Chagnaïe a Gustave,
La Chole a Aristide,
Lés Cllérès a Octave,
La cornère a Alcide,
É la Pointe a Sussèt
O fèt pu qu'in mourcè ;
La Charpraïe a Susane,
Lés Quinbes, lés Grands Versanes,
La Talaïe é lés Trenblles,
O voèla tout ensenblle.
*
Lè çh'émèt tant çhés chanps çh'aviont dous grands palisses
Çhi desèt : "Riortéz lés quies que lés chaçous rentront pa !"
Lè qu'albretèt si bin son pore défint Cllovis
Per que le tapisse toutes lés musses, que le bouchisse touts lés pas.
Zeus çhaviont lés pu bounes téres de toute la quintraïe,
Dos chanps bin queme o fat, tertouts san écoéssins,
Lè çh'avèt jhamè velu qu'o se vendisse une boésselaïe,
Lè çh'émèt pa core tant qu'o passise su çheu sin,
....
É bè, le li ont pa dit
É bè, le li ont pa dit
Que l'ou-z-ont tout éboullé,
Lés chares é lés teréres,
Qu'on sèt pu voure l'étèt
Le petit chemin de la Sabllére,
Que de Lesé a Sevrèt
Ol ét tout a calèt,
Que l'avont pu qu'une litraïe
De lou grand chanp de l'Entraïe,
Qu'en perque l'ont in mourcè
De la vièlle vegne a Sussèt.
*
Lè çhi desèt a çhés droles assis devant la cheminaïe :
"O fot épèrgné le boas, le moécè diminue !"
Lè çh'alèt sou çhés tales renpllir sa paneraïe
De feulles per per sés fermajhes, de nousellates ou de pointues,
O y at pa core lontenp qu'al enmenèt sa petite felle
Ramassé dous mouriclles ou bè dous averllins,
Qu'al la prenèt o cou per jhindre lés nouselles
Ou lés mraïles qu'o y avèt su lés coutés dou chemin.
*
Alore le li ont pas dit.
Alore le li ont pas dit
Qu'ol at fllamé cin jhours
A la grande écroasaïe,
Que l'ou-z-ont verlopé tout,
Le mitan é lés euraïes,
Qu'enter La Bare é Ché
O vela tout d'araché.
L'ont minme dit a çhés gas :
"Surtout, li en coséz pa :
S'a venèt qu'a o savér,
Sèt on çe qu'o perèt fére ?".