L'Abllèse

Marcel AUDURIER

(dit Gheingru, né en 1925 à Ardin près de Niort)

[grafanjhe d'Écrivajhes, Ed. Geste paysanne, 1985]

*

Petit parajhot pllere su san couti. Le ga qui quemande o "dortoir" li at alanjhé ine tape, pasque, a la douche, le yitèt pa san pijhama. Touts lés atres avant rigolé de li. Pertant petit parajhot at pa pou de l'éve : chin li l'at traversé la grand rivère, dersé drèt su lés ortalls avèc l'éve frède o ras do na ! Mé ol ét san perma pijhama pi sa permère douche chade...

Beles pa, petit parajhot !... Te queneus la passe-rousse é le jhonèt dos vegnes...

T'as dénijhé l'obré, l'émouchèt pi la cossarde...

T'as abeché la tourte do boés, calé ta tate dan la cracote do chavan, éfourvallé la frasaïe...

T'as pa pou de l'aspi roujhe qui s'enverlloune dan lés rouches...

T'as éberné la couète a tout pllin d'alans...

T'as permené dan tés goussèts la lavruche é la guernolle.

T'as vu l'arbllèse, tchète épouvessante bate de sorcère, nègre é jhane, qui traverse lés fllames ! De diène, petit parajhot, te l'as vu queme i te voè...

T'as seché l'arbe a l'orajhe, qui se penderlle o pllanchèt é qui avire la chaline...

Te sès l'endrèt dos moussounères mé, tout queme lés nics, t'os dis pa so la late pasque rède lés us seriant cllèrs, lés potirons pardus.

Te queneus l'eure o soulall é t'as vu le soulall pinpa l'éve su la rivère...

Te queneus la musse de levre, le colèt - ine moin in pouce de hat - la coquelle de luma perçaïe per foére veni lés perdris, l'all do lapinot tapé dan l'émorche, lés trins do blléra, l'étchurou é le raliran...

T'as bu le poussi de ranze é l'éve su lés cllous.

T'as matroullé la corme varte, supé le pinè de prunèle é soumallé su le sarpoulèt é pi é pi...binrède core d'atres !

Mé te queneussès pa le pijhama pi la douche chade !

Pllere pu, petit parajhot, ét rin, ét rin !... T'as vu l'arbllèse.