La chançon do bardou

Jacques DUGUET

(né en 1922)

[grafanjhe d'Écrivajhes, Ed. Geste paysanne, 1985]

*

I seu in bardou d'arimajhe

Sorti d'iquiolon en Poétou :

Per qu'i anjhe dan le demajhe

O ne fot jha m'atiné prou.

I n'é rin été os écoles ;

Encoère tout jhène asiron

I é entendu grissé lés moles,

Silé la boète o chasseron.

Aneut o m'ét beacop d'adire :

Os éléccions per se pourté

Ol ét mété de savèr lire

É foère dos jhos en papé.

I queneu lés rèses batisses,

Pouvre, casse, soulall é glla,

Conbe é-z-i fumé de palisses

En sogant mon moètre a cu bas !

I queneu la jhéografie

Do bouchon é de l'échardon,

D'asard que netre Académie

En émolé metrat mon nom.

I queneu étou la musique

Dos greléts vesins dos foussats,

Quélés grands monsus de fisique

Qui savant dos èrs d'armanat.

I é ine chouse dan l'idàie

Qui me tabute ol at bea tenp :

I rève a jhorno de mouneï

San bat, san poche é san forment.

I veuré pertant in jhor prème

M'ébreté o Palès Bourbon.

I é tout per queu : l'éduque é l'ème,

É peu, en mé, la pousicion.

É perdèque, anprè, si o torne,

Éré-z-i pa dan quo quernon

Voure ol oguit mé d'in caborne

É que l'apelant Matignon ?

Per dénanjhé la républlique

Dos mofasants é dos zirous,

O fot in bardou de pratique,

Queme mé tout pllin enguegnous.

I vé déjha voure i coumince ;

En permé fot la charte égué :

I saque Paris en prouvince ;

De mème n-on peurat cosé.

La Vendeïe érat dan la Loère,

Peus qu'avoure al ét do "Pays".

Mé la Loère, de la menère,

Sebrerat Poétou é Auni.

Tout queu ne foét jha netre afoère ;

Coure on aguse on fauche pa.

Lè su m'éspère ma mounère

Qu'i m'en va vèr de quo pas...