Sonié

Freddy BOSSY

(1954 -, Montpellier de Médillan, Saintonge)

[grafanjhe d'Écrivajhes, Ed. Geste paysanne, 1985]

*

Le marès vint roujhe nen la chaline. Le vent de bas ét pa mé en cas de soulajhé la goalète, durant que le balerit' évolajhe çheuques fochaus. Dan çheu mitan mirolé o pic di soulell, lirète galounée per lés èrbes sechées dés bosses, deus pores mondes, daltant coume galipotes en leus vétis passés, çheullant la so. La vièrzon mene de miroèr rose en miroèr rose. Piénut', en sa patrice rède per lés èves mates, le sonié brasse anvéc son roablle, é recoumince a cha caré çhés jhèstes do balant douné per dés jhénéracions de çhus-salés. De l'ote bord de la vée, sa fame magne le servion é saque la crème égoutée dan dés manequins - jhèste rale : cha brin de çhèle so bllanche ves apartient, a vous çhi gouvérnéz çheu chanp ; ni le boujhoas ni lés gabelous y avant part.

Su la tallée, a l'adrét de la cabane onbrajhée per lés tamarins voure vesounant lés mouches é virounant lés musséts, la quenalle dort. La sarpent veurét supé lés goutes de lét su sés balots, mé le chat' pigarlé yète.

Le mètre argade o soulell : ol ét grand tenp d'amètre. Ine piquée dan l'antérno, é le brassous migne lés muants per nori lés ères. Peu, revinre os carés remués é abourné la so anvéc la simouche ; sogoé, apilé, porté o tasselié, aberié de la robe de boure - rins ébarouis, piés é mins ares, ells berlutés de fatique.

Dimanche, a moin que le marè échoderét raport a çhés tenps d'orajhe, jhe nes en irom o vilajhe. O culte, le pasteur lirat dan Matieu : "Vous êtes le sel de la terre", oube o Lévitique : "Tu ne laisseras point manquer le sel de l'alliance". Jhe vérom lés parents - i vèllesissant bin vite, asteure qu'il alant pu o maré -, jhe prenrom lés nouvèles, ferom la luète anvéc lés cousins, d'asard, oube le palét sou lés tilells... O retour - charjhés de pin, de çheuques léyumes per mète en pot, d'in petit de viande do bouché per épargné le lard - a la neut, lés étèles rèyerant su lés conches çhi leu retornerant leur imajhe anvéc çhèle dés vèrs-leusants.

Anvéc la Sint-Micha, o vint le tenp de repré. Mé avant de nijhé le marè, o fot éssentiné lés jhas, nen limé lés doues, apllanesi lés lèdes, é contremoté lés façons. Tertouts vindront péché : l'année dernière, ol avét tant de mells, d'anyilles é de morguins (é le ball nen conte in demi-cent en menu sufrajhe per le bourjhoas) qu'ol at felut lés péché o boguèt'. Mé ol ét otou le tenp dés contes : le marè ét en farme o tièr, é çhés bias tenps, le jhuré at émé mé de çhinze meuds. Si tansement la ballarjhe avét bin poussé su lés bosses, ol arét pa été de besoin de nen ajheté...

Ét l'ivar, lés marès sont a bllan. Soniés revinyuts o vilajhe, jh'oubllirom la so anvéc le milla doré, dous coume la mio, que grand-mère at encoère pouyut çheure per çhéle No. Demin, d'asard irom jhi queri çheuques manètes de mouclles oube sats d'eutres çhi engréssant dan le marè. Demin oube anpré : le lla ét dur o bots é la prise vrè loin... Jhe llaserom lés paniés, ramenderom lés gagnes, renmancherom lés férées, gosserom dés palètes, tapinerom lés sats. L'ouvrajhe coumande, avant de mètre o coa.