INE CHARTRE DE L'AUNIS

("bail à cens des Templiers de La Rochelle, vidimé en 125O par le Commandeur d'Aquitaine")

—

Ge, frere Foques de Saint Michea, comanderes daus maisons de la chevalerie dau Temple en Aguiaine, fois assaveir a toz ceaus qui ceste presente chartre veiront e oïront, que ge ai veu une chartre saielee dau saea frere P. Bos, comandor de la maison dau Temple en la Rochele, en itau forme :

Ge, Perre Bos, ob l'otrei e la volunte daus freres de nostre maison, frere W. Faure, frere P. lo tresorer, frere Renou lo claver (...), avom baille e otreie a Willaume e Giraut Arbert e maistre Girart Vender, borgeis, une partie de nostre besse que nos aviom en la Rochele, apelee la besse a la Raine ; e duret cele partie des la place W. Blundea jusqu'a la terre de l'Ospitau, e d'iqui s'en vait au mur de la vile qui est pres de la chenau daus II molins ; e de l'autre part, des la maison audit Blundea devers la rue joignant a la terre au conte de Peiters, jusqu'audit mur.

E, ob tot iceu, lor avom baille e otreie ceu que nos aviom defors lo davant dit mur jusqu'aus bacious qui sunt de l'autre part de la chenau, a tenir e espleiter, e a charger e decharger granz vaisseas e petiz en la chenau.

E totes icestes choses nos lor avom baille e otreie, a eaus e a lor heirs, por C sols de cens rendant chascun an, par les IIII quarterons de l'an.

E por ceu que ceste chose seit plus ferme e plus estable, ge lor en ai done ceste presente chartre, l'an de l'Incarnacion Jesu-Crist MCC e XLIX, on meis de fevrer.

Nos donques (F. de St-Michea) voguismes e otreasmes toz les diz de ceste chartre.