L'Ivar
Lexis CHABOUESSA
[grafanjhe d'Écrivajhes, Ed. Geste Paysanne, 1985]
*
La néjhe os bllans linceus épare la bujhée
Dan lés chemins, su lés boessons
É su lés tublles dés minsons.
Lés flleùrs de jhiverlla, su lés abres huchées,
Fasant sinjhé de çheu moument
Os étèles do firmament.
Le fréd sabe la pia pu pis que lés ortujhes ;
Lés groles mogré çheu, s'épivardant en llan,
É n-on crérét avoure, voèr dés petas de sujhe
Éferniqués pertout su in grand balin bllan.
Lés droles s'en alant en cllasse,
Lés mins grèpes, la bisse o né,
É terzalant, enbobinés
Dan leu cape voure le vent passe,
En subllant coume dés dannés.
Ol ét point le moument
Que n-on cale le fragne,
Per dés sublléts obe dés sounas ;
O ferét putout calé le cragne,
Que n-on crérét que n-on buche a grands cots de marta.
Lés chétis rabalous, leus guelles su l'épale,
Quenant é plléjhant de la rale,
S'abrasant su dés pilots de challs
Coume dés ublles que n-on foche ;
La Mourine ayuse son dall :
Ol ét, avoure, per lé, la séson qu'al enboche !