La méson a Millène
Robert BEAU
(1921-, Tillou)
[grafanjhe d'Écrivajhes, Ed. Geste paysanne, 1985]
*
Dépeu que lés jhenes avant fét construire dan le jhardin
É que lés vieus sont morts, min i sé en gosserie.
Penséz ! Une vèlle quemme min, ol ét pu bon a rin,
Qu'a sarvir de débaras per lés vèlles saloperies.
L'ont léché la une tablle, dos chèses toutes défonçaïes,
La souche a fére boucherie, lés pots de cré, in salou,
L'y métont lés trouflles é tout c'qui crind la jhelàie,
Lés sarpes, in ban-marot é son couta-parous.
Que vela une vèlle queme min ol ét pu a la mode.
O fot do fllanbant nu per lés mondes d'aneut.
Dan çhés vèlles masures, o y at pu rin de quemode.
O bufe sous lés portes, on y veut queme la neut.
La pouvre vole pertout chaque fé qu'on jhence la pllace,
O cheut dos saloperies a travèr lés pllanchés,
Quant o moulle, devant la porte, o y at terjhou une gasse,
É ol ét bllu de moasi dare lés lits et le bufèt.
- Voéla ce qu'a m'a dit la méson a Millène,
Une seraïe qu'i passè devant en venant de me promena.
Min qui lés ème tant çhés mésons anciènes,
I poussi la vèlle porte é i mussi mon na.
I ne cré pa os miraclles. I avè pertant pa bu.
Ét o le rè de soulèll qui venèt per l'ell do bac
Qui m'at boulé le cala é m'at troubllé la vue ?
... segàe (à suivre)...
__________________
in Écrivajhes, anthologie 1874-1984, Geste Paysanne (1985)